H The Comprehensive Aramaic Lexicon

CAL CODE HELP CLICK HERE
click on the file description for more information

32000: BA Daniel chapter 5

click on a word for lexical analysis
Click on a red-colored coordinate for comments and/or translations of the line

previous


10:5 בֵּלְשַאצַּר מַלְכָּא עֲבַד לְחֶם רַב לְרַבְרְבָנוֹהִי אֲלַף וְלָקֳבֵל אַלְפָּא חַמְרָא שָתֵה׃
20:5 בֵּלְשַאצַּר אֲמַר בִּטְעֵם חַמְרָא לְהַיְתָיָה לְמָאנֵי דַּהֲבָא וְכַסְפָּא דִּי הַנְפֵּק נְבוּכַדְנֶצַּר אֲבוּהִי מִן הֵיכְלָא דִּי בִירוּשְלֶם וְיִשְתּוֹן בְּהוֹן מַלְכָּא וְרַבְרְבָנוֹהִי שֵגְלָתֵהּ וּלְחֵנָתֵהּ׃
30:5 בֵּאדַיִן הַיְתִיו מָאנֵי דַהֲבָא דִּי הַנְפִּקוּ מִן הֵיכְלָא דִּי בֵית אֱלָהָא דִּי בִירוּשְלֶם וְאִשְתִּיו בְּהוֹן מַלְכָּא וְרַבְרְבָנוֹהִי שֵגְלָתֵהּ וּלְחֵנָתֵהּ׃
40:5 אִשְתִּיו חַמְרָא וְשַבַּחוּ לֵאלָהֵי דַּהֲבָא וְכַסְפָּא נְחָשָא פַרְזְלָא אָעָא וְאַבְנָא׃
50:5 בַּהּ שַעֲתָה נפקו״#ק#נְפַקָה״ אֶצְבְּעָן דִּי יַד אֱנָש וְכָתְבָן לָקֳבֵל נֶבְרַשְתָּא עַל גִּירָא דִּי כְתַל הֵיכְלָא דִּי מַלְכָּא וּמַלְכָּא חָזֵה פַּס יְדָה דִּי כָתְבָה׃
60:5 אֱדַיִן מַלְכָּא זִיוֹהִי שְנוֹהִי וְרַעְיֹנֹהִי יְבַהֲלוּנֵּהּ וְקִטְרֵי חַרְצֵהּ מִשְתָּרַיִן וְאַרְכֻבָּתֵהּ דָּא לְדָא נָקְשָן׃
70:5 קָרֵא מַלְכָּא בְּחַיִל לְהֶעָלָה לְאָשְפַיָּא כשׂדיא״#ק#כַּשְׂדָּאֵי״ וְגָזְרַיָּא עָנֵה מַלְכָּא וְאָמַר לְחַכִּימֵי בָבֶל דִּי כָל אֱנָש דִּי יִקְרֵה כְּתָבָה דְנָה וּפִשְרֵהּ יְחַוִּנַּנִי אַרְגְּוָנָא יִלְבַּש והמונכא״#ק#וְהַמְנִיכָא״ דִי דַהֲבָא עַל צַוְּארֵהּ וְתַלְתִּי בְמַלְכוּתָא יִשְלַט׃
80:5 אֱדַיִן עללין״#ק#עָלִּין״ כֹּל חַכִּימֵי מַלְכָּא וְלָא כָהֲלִין כְּתָבָא לְמִקְרֵא ופשרא״#ק#וּפִשְרֵהּ״ לְהוֹדָעָה לְמַלְכָּא׃
90:5 אֱדַיִן מַלְכָּא בֵלְשַאצַּר שַׂגִּיא מִתְבָּהַל וְזִיוֹהִי שָנַיִן עֲלוֹהִי וְרַבְרְבָנוֹהִי מִשְתַּבְּשִין׃
01:5 מַלְכְּתָא לָקֳבֵל מִלֵּי מַלְכָּא וְרַבְרְבָנוֹהִי לְבֵית מִשְתְּיָא עללת״#ק#עַלַּת״ עֲנָת מַלְכְּתָא וַאֲמֶרֶת מַלְכָּא לְעָלְמִין חֱיִי אַל יְבַהֲלוּךְ רַעְיוֹנָךְ וְזִיוָיךְ אַל יִשְתַּנּוֹ׃
11:5 אִיתַי גְּבַר בְּמַלְכוּתָךְ דִּי רוּחַ אֱלָהִין קַדִּישִין בֵּהּ וּבְיוֹמֵי אֲבוּךְ נַהִירוּ וְשָׂכְלְתָנוּ וְחָכְמָה כְּחָכְמַת אֱלָהִין הִשְתְּכַחַת בֵּהּ וּמַלְכָּא נְבֻכַדְנֶצַּר אֲבוּךְ רַב חַרְטֻמִּין אָשְפִין כַּשְׂדָּאִין גָזְרִין הֲקִימֵהּ אֲבוּךְ מַלְכָּא׃
21:5 כָּל־קֳבֵל דִּי רוּחַ יַתִּירָה וּמַנְדַּע וְשָׂכְלְתָנוּ מְפַשַּר חֶלְמִין וַאַחֲוָיַת אֲחִידָן וּמְשָרֵא קִטְרִין הִשְתְּכַחַת בֵּהּ בְּדָנִיֵּאל דִּי מַלְכָּא שָׂם שְמֵהּ בֵּלְטְשַאצַּר כְּעַן דָּנִיֵּאל יִתְקְרֵי וּפִשְרָה יְהַחֲוֵה׃
31:5 בֵּאדַיִן דָּנִיֵּאל הֻעַל קֳדָם מַלְכָּא עָנֵה מַלְכָּא וְאָמַר לְדָנִיֵּאל אנתה״#ק#אַנְתְּ״ הוּא דָנִיֵּאל דִּי מִן בְּנֵי גָלוּתָא דִּי יְהוּד דִּי הַיְתִי מַלְכָּא אַבִי מִן יְהוּד׃
41:5 וְשִמְעֵת עליך״#ק#עֲלָךְ״ דִּי רוּחַ אֱלָהִין בָּךְ וְנַהִירוּ וְשָׂכְלְתָנוּ וְחָכְמָה יַתִּירָה הִשְתְּכַחַת בָּךְ׃
51:5 וּכְעַן הֻעַלּוּ קָדָמַי חַכִּימַיָּא אָשְפַיָּא דִּי כְתָבָה דְנָה יִקְרוֹן וּפִשְרֵהּ לְהוֹדָעֻתַנִי וְלָא כָהֲלִין פְּשַר מִלְּתָא לְהַחֲוָיָה׃
61:5 וַאֲנָה שִמְעֵת עליך״#ק#עֲלָךְ״ דִּי תוכל״#ק#תִכֻּול״ פִּשְרִין לְמִפְשַר וְקִטְרִין לְמִשְרֵא כְּעַן הֵן תוכל״#ק#תִּכֻּול״ כְּתָבָא לְמִקְרֵא וּפִשְרֵהּ לְהוֹדָעֻתַנִי אַרְגְּוָנָא תִלְבַּש והמונכה״#ק#וְהַמְנִיכָא״ דִי דַהֲבָא עַל צַוְּארָךְ וְתַלְתָּא בְמַלְכוּתָא תִּשְלַט׃
71:5 בֵּאדַיִן עָנֵה דָנִיֵּאל וְאָמַר קֳדָם מַלְכָּא מַתְּנָתָךְ לָךְ לֶהֶוְיָן וּנְבָזְבְּיָתָךְ לְאָחֳרָן הַב בְּרַם כְּתָבָא אֶקְרֵא לְמַלְכָּא וּפִשְרָא אֲהוֹדְעִנֵּהּ׃
81:5 אנתה״#ק#אַנְתְּ״ מַלְכָּא אֱלָהָא עליא״#ק#עִלָּאָה״ מַלְכוּתָא וּרְבוּתָא וִיקָרָא וְהַדְרָה יְהַב לִנְבֻכַדְנֶצַּר אֲבוּךְ׃
91:5 וּמִן רְבוּתָא דִּי יְהַב לֵהּ כֹּל עַמְמַיָּא אֻמַיָּא וְלִשָּנַיָּא הֲווֹ זאעין״#ק#זָיְעִין״ וְדָחֲלִין מִן־קֳדָמוֹהִי דִּי הֲוָה צָבֵא הֲוָא קָטֵל וְדִי הֲוָה צָבֵא הֲוָה מַחֵא וְדִי הֲוָה צָבֵא הֲוָה מָרִים וְדִי הֲוָה צָבֵא הֲוָה מַשְפִּיל׃
02:5 וּכְדִי רִם לִבְבֵהּ וְרוּחֵהּ תִּקְפַת לַהֲזָדָה הָנְחַת מִן כָּרְסֵא מַלְכוּתֵהּ וִיקָרָה הֶעְדִּיוּ מִנֵּהּ׃
12:5 וּמִן בְּנֵי אֲנָשָא טְרִיד וְלִבְבֵהּ עִם חֵיוְתָא שוי״#ק#שַוִּיו״ וְעִם עֲרָדַיָּא מְדוֹרֵהּ עִשְׂבָּא כְתוֹרִין יְטַעֲמוּנֵּהּ וּמִטַּל שְמַיָּא גִּשְמֵהּ יִצְטַבַּע עַד דִּי יְדַע דִּי שַלִּיט אֱלָהָא עליא״#ק#עִלָּאָה״ בְּמַלְכוּת אֲנָשָא וּלְמַן דִּי יִצְבֵּה יְהָקֵים עליה״#ק#עֲלַהּ״׃
22:5 ואנתה״#ק#וְאַנְתְּ״ בְּרֵהּ בֵּלְשַאצַּר לָא הַשְפֵּלְתְּ לִבְבָךְ כָּל־קֳבֵל דִּי כָל דְּנָה יְדַעְתָּ׃
32:5 וְעַל מָרֵא שְמַיָּא הִתְרוֹמַמְתָּ וּלְמָאנַיָּא דִי בַיְתֵהּ הַיְתִיו קדמיך״#ק#קָדָמָךְ״ ואנתה״#ק#וְאַנְתְּ״ ורברבניך״#ק#וְרַבְרְבָנָךְ״ שֵגְלָתָךְ וּלְחֵנָתָךְ חַמְרָא שָתַיִן בְּהוֹן וְלֵאלָהֵי כַסְפָּא וְדַהֲבָא נְחָשָא פַרְזְלָא אָעָא וְאַבְנָא דִּי לָא חָזַיִן וְלָא שָמְעִין וְלָא יָדְעִין שַבַּחְתָּ וְלֵאלָהָא דִּי נִשְמְתָךְ בִּידֵהּ וְכָל אֹרְחָתָךְ לֵהּ לָא הַדַּרְתָּ׃
42:5 בֵּאדַיִן מִן־קֳדָמוֹהִי שְלִי{ַ}חַ פַּסָּא דִי יְדָא וּכְתָבָא דְנָה רְשִים׃
52:5 וּדְנָה כְתָבָא דִּי רְשִים מְנֵא מְנֵא תְּקֵל וּפַרְסִין׃
62:5 דְּנָה פְּשַר מִלְּתָא מְנֵא מְנָה אֱלָהָא מַלְכוּתָךְ וְהַשְלְמַהּ׃
72:5 תְּקֵל תְּקִילְתָּה בְמֹאזַנְיָא וְהִשְתְּכַחַתְּ חַסִּיר׃
82:5 פְּרֵס פְּרִיסַת מַלְכוּתָךְ וִיהִיבַת לְמָדַי וּפָרָס׃
92:5 בֵּאדַיִן אֲמַר בֵּלְשַאצַּר וְהַלְבִּישוּ לְדָנִיֵּאל אַרְגְּוָנָא והמונכא״#ק#וְהַמְנִיכָא״ דִי דַהֲבָא עַל צַוְּארֵהּ וְהַכְרִזוּ עֲלוֹהִי דִּי לֶהֱוֵא שַלִּיט תַּלְתָּא בְּמַלְכוּתָא׃
03:5 בֵּהּ בְּלֵילְיָא קְטִיל בֵּלְאשַצַּר מַלְכָּא כשׂדיא״#ק#כַשְׂדָּאָה״׃

next